இலங்கையின் கனிம மணல் அகழ்வு: பொருளாதார வாய்ப்பா அல்லது சூழலியல் அபாயமா?

சுற்றுச்சூழல் மற்றும் நிலத்தடி நீர் அபாயங்கள்

டைட்டானியம் சேண்ட்ஸ் திட்டம் முதற்கட்டமாக 2 ஹெக்டேர் பரப்பளவில் 12 மீட்டர் ஆழத்திற்கு அகழத் திட்டமிடப்பட்டுள்ளது. நிலத்தடி நீரைக் காப்பாற்ற மூடிய சுழற்சி நீர் மறுசுழற்சி முறைகள்  முன்மொழியப்பட்டாலும் (closed-loop system), மன்னாரின் பறவைகள் புகலிடம் மற்றும் களப்பு நீர்நிலைகளைப் பாதுகாக்க முழுத் தீவுக்குமான சூழலியல் தாக்க மதிப்பீடு (whole-island Environmental Impact Assessment) செய்யப்பட வேண்டும் என உள்ளூர் சூழலியல்  நிறுவனங்கள் வலியுறுத்துகின்றன.

தப்ரபேன் திட்டச் சூழலியல் அறிக்கையின்படி, மணற்குன்றுகளை அகழ்வதால் 2 அரிய தாவரங்கள், 5 இலங்கைக்கு மட்டுமே உரித்தான தாவரங்கள் மற்றும் 12 தேசிய அளவில் அச்சுறுத்தலுக்கு உள்ளான தாவர இனங்கள் அழியும் அபாயம் உள்ளது. மேலும், சின்ன முகத்துவாரம், பெரிய முகத்துவாரம் மற்றும் கொராலே களப்பு நீர்நிலைகளை நம்பியுள்ள சுமார் 3,000 மீனவக் குடும்பங்களின் வாழ்வாதாரமும் கேள்விக்குறியாகிறது. கடலோர மணற்குன்றுகள் என்பவை வெறும் மணல் திரள்கள் மட்டுமல்ல, அவை புயல் கரையேற்றங்களிலிருந்து கரைகளைப் பாதுகாக்கும் அரண்களாகும். இவற்றை அழிப்பது கடலோர அரிப்பைத் தீவிரப்படுத்தி, நிலத்தடி நீரை உவர்நீராக மாற்றும் அபாயத்தைக் கொண்டுள்ளது.

ஒருங்கிணைந்த தாக்கங்கள் மற்றும் எதிர்கால எண்ணெய் ஆய்வு

தனித்தனி திட்டங்களாகப் பார்க்கும்போது சிறியதாகத் தோன்றும் பாதிப்புகள், ஒன்றாகச் சேரும்போது பேரழிவாக மாறக்கூடும். மன்னார் வளைகுடாவில் முன்மொழியப்பட்டுள்ள கடலோர எண்ணெய் மற்றும் எரிவாயு ஆய்வுத் தொகுதிகள், துறைமுக அகழ்வுப் பணிகள் மற்றும் கனிம மணல் அகழ்வு ஆகியவை ஒரே நேரத்தில் நிகழும்போது, கடலோர மற்றும் கடல் சூழல் அமைப்புகள் மீதான அழுத்தம் பன்மடங்காகிறது.

இது கடலோர பவளப்பாறைகள், கடற்புல் வெளிகள், சதுப்புநிலங்கள் மற்றும் புலம்பெயர் பறவைகளின் வாழ்விடங்கள் என ஒட்டுமொத்த தாக்கமும் பெரும் சூழலியல் அழிவை மட்டுமல்லாது இலங்கையின் கடல் உணவுப்பாதுகாப்பையே கேள்விக்குறியாக்கும்.